Elizalde Herri Eskolako ikasleak baratzetan

Elizalde Herri Eskolako ikasleak urriaren 3an Altzibarko gure baratzean izan ziren. Besteak beste, sagar bilketa eta barazki ezberdinen landaketak egin zituzten.

Beraien blogean ikus ditzakezue egun horretako argazkiak.

Advertisements

Banaketak berriz ere plazan

Ikasturte berriaren hasierarekin batera, Kontsumo Taldeko banaketak berriz ere plazan hasiko dira, beti bezala astelehenetan 18:00etan. Hurrengo asterako arrautzak eskatzeko aukera ere izango da.

Bestalde, jakinarazi nahi dugu Kontsumo Taldean sartzeko aukera badagoela. Hileroko kuota 50€-koa da eta hilabetean 4 saski jasotzeko aukera dago. Interesa duenak gure webgunean aurkituko du informazio gehiago.

Udako antolaketa 2018

Langileen oporrak direla eta, abuztuan ez da banaketarik egingo eta taldekideok gure barazkiak biltzera joateko aukera izango dugu. Hortaz, hauek dira kontuan hartu beharreko datak:

Captura de pantalla 2018-08-09 a las 9.24.21.png

Bilketak Ergoiengo eta Makutsoko baratzetan egin behar dira. Bakoitzean jaso beharreko barazkiak hauek dira:

  • Ergoien: Piperrak, Letxugak, Kukuluak, Kalabazinak, Tipulak, Lekak eta Berenjenak.
  • Makutso: Tomateak, Lekak, Letxugak, Kalabazinak, Azelgak, Berenjenak eta Piperrak.

Denok joan gaitezke gure barazkiak bila, baina ez du zertan egun horietan izan. Bilketa denon artean egitea errazagoa da, hala ere, ezin baduzue egun edo ordu horietan, lasai joan zaitezkete zuen kabuz.

Kontuan hartu baratzean aritzeko oinetako eta arropa egokia eraman behar dela. Gainera, komenigarria izaten da eskularruak, labana txiki bat eta barazkiak biltzeko poltsak/saskia eramatea.

Auzolanerako deia

Arraztalok uztailan auzolanerako deia zabaltzen du lagundu nahi duten guztientzat.

Auzolanerako egunak hauek izango dira: 19 (osteguna), 24 (asteartea) eta  26 osteguna.
Lekua: Makutsoko baratza (bidegorri ondokoa).
Ordua: Goizeko 10:00-12:30 bitartean.

Ez da beharrezkoa lanerako tresnarik eramatea, arropa egokia eta lanerako gogoa besterik ez!!!

Animatu parte hartzera!!!

Abuztuko banaketa

Prentsa-oharra: ENPLEGU ZENTRO BEREZIAK ETA GAIXOTASUN PSIKIKOA DUTEN PERTSONEN LAN INTEGRAZIOA

Arraztalo eta Aldura Elkarteak Oarsoaldean gaixotasun psikikoa duten pertsonen alde lanean gabiltza azkeneko urte hauetan. Lan horren helburua pertsona hauen lan eta gizarte integrazioa lortzea da. Gu sortu aurretik bazeuden lan integrazioan ari diren erakunde eta enpresak, eta horiek egiten duten lana aitortu beharra dago. Hala era, bere garaian hutsunea nabaritu genuen, pertsona batzuk ohikoak diren lan integrazio zirkuitutik kanpo geratzen baitira.

Desgaitasunen bat duten pertsonentzako lanpostuak sortu eta kudeatzeko tresna nagusietako bat Enplegu Zentro Bereziak dira. Zentro hauek enpresa mota bat dira eta desgaitasuna duten langileek lan produktibo eta ordaindua edukitzea ahalbidetzen duten. Horretarako bereziki prestatuak daude. Erakunde publikoek zentro hauek era ezberdinetan laguntzen dituzte, desgaitasuna duten pertsonen lan integrazioak dituen zailtasunak eta onurak onartuz.

Gaur egun, Enplegu Zentro Berezi bat sortzea Euskadiko Autonomia Erkidegoan ezinezkoa da, horretarako beharrezkoa den erregistroa eta arautegia garatu gabe dagoelako. Eusko Jaurlaritzaren eta Lanbideren betebeharra den arren, urteak joan eta urteak etorri, legedi hori garatu gabe geratu da. Egoera xelebrea dugu esku hartean, Estatuko beste edozein erkidegotan Enplegu Zentro berezia sortu daiteke, baina Euskadin ez.

2013an hasita, Arraztalok eta Aldurak behin eta berriz eskatu diote Eusko Jaurlaritzari beharrezkoa den legedi hori garatzeko. Eskaerak egiteko bide ezberdinak jarraitu dira. Etengabeko hartu-emana izan da Eusko Legebiltzarreko talde politikoekin, bertan, interpelazioak, mozioak eta galderak bideratzeko. Hala nahi izan dutenean, Arartekoarekin eta Lanbideko zuzendariarekin ere bildu izan gara.

Enplegu Zentro Berezien erregistroa ez edukitzeak ondorio zuzena du Aldura eta Arraztaloren jardunean. Aldurak zailtasunak ditu etorkizunean martxan jarri nahi dituen jarduera berriak hasteko. Arraztalok berriz, ezin du Baratza Ekologikoen proiektua era jasangarri batean mantendu. Oiartzungo Udalaren etengabeko laguntza eta beste erakundeen noiz-behinkako laguntza jasotzen duen arren, gaur egun, ez ikuspuntu sozialetik ezta ekonomikotik ere ezin da proiektua horrela mantendu. Lan baldintza duinak lortzekotan, Enplegu Zentro Berezia martxan jartzea ezinbestekoa da. Hori ez den irtenbide ugari aztertu ditugu, eta baten bat bideragarria izan balitz, dagoeneko martxan egongo litzatekeela dudarik ez egin.

Eusko Jaurlaritzaren eta Lanbideren erantzun eta konpromiso falta ikusirik, arazoa publiko egitea beharrezkoa dela uste dugu. Eusko Jaurlaritzatik jaso dugun azkeneko erantzunak dionez, 2018ko martxoan onartu behar zen legedia. Lehendakariak berak, 2017ko urrian egindako agerraldi batean, desgaitasuna duten pertsonentzako politika aktiboak arautuko dituen dekretua Jaurlaritzaren hurrengo ekimenetan dagoela adierazi zuen. Berandu baino lehen dekretua onartzea eskatzen diogu.

Honez gain, Oarsoaldeko udalbatzak ere arazo honen inguruan euren iritzia plazaratu dezaten, mozioak aurkeztuko ditugu epe laburrean.

Jaurlaritzaren legegintzaldi honetako goiburua “Auzolana” da. Guk auzolanean ia 10 urte daramatzagu gaixotasun psikikoa duten pertsonen lan integrazioa lortu nahian.

2018ko batzar orokorra, martxoaren 22an

Arraztalo urteko batzar orokorra egingo du martxoaren 22an, osteguna, 19:00etan Altzibarko egoitzan. Arraztaloren proiektuaren baitan 2017an zehar egindako ekintzak eta hauen balorazioa azalduko da.

Horrez gain, 2017ko diru-kontuen eta jasotako diru-laguntzen argibideak ere emango dira. Elkartetik Arraztaloko kideei eta elkartearekin ekintza ezberdinetan parte hartu duten guztiei dei egiten diegu, batzarrera etor daitezen.

Batzarraren gai-zerrenda honakoa da:

  1. Integrazio programa
  2. Diru-kontuak eta diru-laguntzak
  3. 2017ko sentsibilizazio ekintzak
  4. Enplegu Zentru Berezia
  5. Aldura
  6. Eskari-galderak

Gai hauei eta gehiagori buruzko informazioa 2017 urteko txostenean aurki dezakezue.

Arraztalo, Karabelekok antolatutako Baratze-terapia jardunaldian

Karabeleko ekonekazaritza etxaldeak, Baratze-terapiari buruzko jardunaldia antolatu du otsailaren 13an. 9:00etatik 13:00etara izango da, Karabelekon bertan, Hernanin.

Jardunaldiaren lehenengo zatian, Jakoba Errekondo paisajista eta agronomoa eta Marc Olomi baratze-terapian aditua izango dira hizlari.

Bigarren zatian hiru esperientzia ezagutzeko aukera izango dute, Ereiaro, Pausoak eta Arraztalo.

Gure kasuan, 2010ean baratza ekologikoen proiektua martxan jarri genuenetik orain arte izan dugun esperientzia kontatuko dugu. Bertan izango gara, baratzetako lantaldea eta baita elkarteko kideak ere.

Zatoz jardunaldira!  Eman izena otsailaren 9a baino lehen karabeleko@gmail.com helbidera idatziz

Informazio gehiagorako Karabelekoren webgunera jo.